অৰণ্য ধ্বংস

       অৰণ্য ধ্বংস ( Deforestation)

    

         পৰিবেশ আৰু জৈৱবৈচিত্ৰ্যৰ ভাৰসাম্য ৰক্ষাৰ বাবে গছ-গছনিৰ গুৰুত্ব অপৰিসীম৷ গছে পৰিবেশৰ অতিৰিক্ত তাপমাত্ৰা শোষণ কৰি পৰিবেশ নিৰ্মল কৈ ৰাখে আৰু সেইদৰে ক্ষতিকাৰক গেছ কাৰ্বন ডাই অক্সাইড গ্ৰহণ কৰি প্ৰাণী বাচি থকাৰ মূল উপাদান অক্সিজেন নিৰ্গমন কৰে৷ কিন্তু জনসংখ্যাৰ চাপত দিনক দিনে অৰণ্য বা গছ নিধন হৈছে৷ ইয়াৰ ফলত আমাৰ চাৰিওপিনে কাৰ্বন ডাই অক্সাইডৰ পৰিমাণ বাঢ়ি গৈ পৰিবেশৰ বিস্তৰ ক্ষতি হৈছে৷ বৰষুণৰ পৰিমাণো কমি গৈছে৷ বৃক্ষই পশুপক্ষী, কীটপতঙ্গ আৰু অণুজীৱৰ আশ্ৰয়স্থল হিচাবে গুৰুত্বপূৰ্ণ ভূমিকা পালন কৰে৷ নিৰ্বিচাৰ বন ধ্বংসৰ ফলত বিভিন্ন জাতৰ উদ্ভিদ, পশুপক্ষী আজি বিলুপ্তিৰ পথত৷

         বিশেষজ্ঞ সকলৰ মতে পৰিবেশ আৰু জলবায়ু পৰিবৰ্তনৰ অন্যতম কাৰণ হৈছে দেশৰ বনাঞ্চল সংকুচিত হোৱাৰ বাবে৷

  অৰণ্য ধ্বংস হোৱাৰ প্ৰধান কাৰণ সমূহ-----

(১) অৰণ্য ধ্বংসৰ অন্যতম কাৰণ হৈছে কৃষি৷ বননি পৰিষ্কাৰ কৰি খেতি কৰা হ’য়৷ প্ৰায় ৮০% অৰণ্য এইদৰে ধ্বংসৰ মুখত পৰে৷

(২) নতুন নতুন নিৰ্মাণ কাৰ্যও অৰণ্য ধ্বংসৰ আন এটা প্ৰধান কাৰণ৷

(৩) নগৰীকৰণও এটা অৰণ্য ধ্বংসৰ কাৰক বুলিব পাৰি৷

(৪) খহনীয়াও অৰণ্য ধ্বংসৰ এটা প্ৰধান কাৰণ৷

          অৰণ্য ধ্বংসই জৈৱবৈচিত্ৰৰ বিস্তৰ ক্ষতি কৰে৷ গোটেই পৃথিৱীৰ বিষুৱীয় অঞ্চল, য’ত যথেষ্ট পৰিমাণে গছগছনি আছে, তাত অৰণ্য ধ্বংস বেছিকৈ হ’য়৷ এই ধ্বংসই বৰ্ষাৰণ্য সমূহত সাংঘাতিক প্ৰভাৱ পেলাইছে৷ আমাৰ অসমৰ বৰ্ষাৰণ্য কেইখনো  যথেষ্ট ধ্বংসৰ সন্মূখীন হৈছে৷ পৃথিৱীৰ সৰ্ববৃহৎ বৰ্ষাৰণ্য-- আমাজান বৰ্ষাৰণ্যৰ ৭০% মানেই ধ্বংস হৈ গ’ল৷

         শুনিবলৈ আচহুৱা যদিও পৰিবেশৰ ভাৰসাম্য ৰক্ষাৰ হেতু গছগছনিয়ে শব্দ প্ৰদূষণ ৰোধ কৰে৷ এক হেক্টৰ পৰিমাণ বননিয়ে ১০ ডেচিবেল শব্দ হ্ৰাস কৰে৷ জনসংখ্যা বৃদ্ধিৰ কাৰনে বা বিভিন্ন উন্নয়নৰ কামত বননি ধ্বংস হৈছে৷ সেই হেতু বিভিন্ন দেশৰ চৰকাৰে বনভূমি ৰক্ষাৰ কৰিবলৈ অৰণ্যৰ আশেপাশে বৃক্ষৰোপণৰ নিচিনা মহৎ কাম কৰিবলৈ লৈছে৷

        কিছু বিশেষজ্ঞৰ মতে মাংস আৰু গাখীৰৰ পৰা তৈয়াৰ হোৱা বস্তু খোৱা কমালে, অৰণ্য ধ্বংস কিছু পৰিমাণে ৰোধ হ’ব৷ কাৰণ তেতিয়া খেতিৰ মাটি(farm land) কমকৈ লাগিব আৰু অৰণ্য নিধন কমকৈ হ’ব৷ বহুত মানুহে সেইবাবে আজিকালি নিৰামিষাহাৰী হোৱাৰ লগতে গাখীৰৰ পৰা তৈয়াৰ হোৱা বস্তু(diary products) খোৱা সম্পূৰ্ণ ৰূপে বাদ দিছে৷ ইংৰাজীত এওঁলোকক vegan বুলি কোৱা হ’য়৷

         যিবোৰ সামগ্ৰী পৰিবেশৰ প্ৰতি অনুকুল (eco friendly), তেনেকুৱা সামগ্ৰীহে ব্যৱহাৰ কৰিব লাগে৷ ক্ষুদ্ৰ খেতিয়কে কৰা বস্তু ক্ৰয় কৰিব লাগে, কাৰণ সাধাৰণতে তেওঁলোকৰ কৰা খেতিয়ে জৈৱবৈচিত্ৰৰ ক্ষতি নকৰে৷

 অৰণ্য ধ্বংসৰোধৰ বাবে কৰণীয় হৈছে----

(১) অসৎ উপায়েৰে বননি ধ্বংস কৰা বন্ধ কৰিব লাগে৷ ইয়াৰ বাবে কঠোৰৰ পৰা কঠোৰ আইন বলবৎ হোৱা অতি আৱশ্যক৷

(২) অৰণ্য ধ্বংস কৰি কৰা সামগ্ৰী সমূহৰ উৎপাদনত নাকী লগাব লাগে৷ তাৰবাবে কিছু আইন প্ৰণয়ন হোৱা অতি জৰুৰী৷

(৩) আন এটা প্ৰধান কৰণীয় হৈছে, সাধাৰণ জনগণৰ মাজত সজাগতাৰ সৃষ্টি কৰিব লাগে৷ তেওঁলোকক অৰণ্যৰ আৱশ্যকতাৰ বিষয়ে বুজাই দিয়াটো অতি দৰকাৰ৷

       এটা কথা সকলোৱে মনত ৰখা অতি জৰুৰী...অৰণ্য এখন ধ্বংস কৰিবলৈ বেছি সময় নালাগে….অৰণ্য এখন নিৰ্মাণ কৰিবলৈ বহু বছৰৰ প্ৰয়োজন…..🙏🙏

     স্মিতা ভাগৱতী

      গুৱাহাটী

    ৰচনা-- ১৬/১২/২০

গোটত প’ষ্ট--১৭/১১/২১